bo nadal

 Dende o EDLG, Equipo de Dinamización da Lingua Galega

desexámosvos...

 

festexamos o nadal!

 O pasado 21 despedimos o trimestre festexando o Nadal🎄

Saímos cantalos reis polos arredores da escola. Enchemos os buzóns de postaois feitas con moito agarimo. Ata nos atopamos co Grinch. Menudo susto levamos!😀

E rematamos a mañá rindo a gargalladas co Mago Rey Midas 🎩😄

mes da ciencia en galego nas bibliotecas

 O pasado mes de Novembro foi o mes da ciencia en galego nas bibliotecas e no Xixirei fixemos unha chea de experimentos. Mirade, mirade!! 

 

roteiros de outono

 Nestes meses de Outono desfrutamos moito nos roteiros: buscamos cogumelos, camiñamos sobre as follas secas, apañamos landras e castañas...

 

colar de zonchos

 Coñeces a tradición do colar de zonchos?

Era unha tradición de veneración dos mortos. O día 1 de novembro  a xente ía ao camposanto cun colar de zonchos no pescozo para honrar ás persoas finadas.

O alumnado de 4º acertou o nome deste colar. Parabéns!!!👏👏
 

magosto

 O pasado venres tivemos Magosto na escola!!🌰🌰

Comezamos o día escoitando os contos de María da Pontragha. Encantounos!👏👏

Despois comemos as castañas e o chocolate. Que merenda tan deliciosa!😋😋

E rematamos xogando ás carreiras de sacos, comecastañas...

 

SAMAÍN

 O pasado venres celebramos na escola o Samaín 🎃

Durante toda a semana trouxemos da casa cabazas talladas ou calacús para colocar no patio e asustar a toda a xente que por alí pasaba. Tamén decoramos as aulas e os corredores.

 

 O venres chegou o día da festa! A escola encheuse de pantasmas, zombies, esqueletos... Que medo pasamos!!!

 As nenas e nenos de 4º representaron "A noite de Samaín". As cinco irmás non eran capaces de durmir naquel cuarto cheo de monstros.

Grazas aos compis de 6º por preparar un decorado tan chuli.

  

Despois do teatro viñeron os conxuros!

 E para rematar a festa, bailamos ao son do Jocker acordeonista. Grazas polo concerto!

DÍA EUROPEO DAS LINGUAS

 O pasado 26 de setembro conmemorouse o Día Europeo das Linguas, unha iniciativa do Consello de Europa que festexa a diversidade lingüística e convida a reivindicar os dereitos lingüísticos das falantes.

  

Correlingua 2018 pola normalización lingüística da mocidade e a infancia na cidade de Vigo.

comeza un novo curso!

 Dende o equipo de EDLG dámosvos a benvida a este novo curso que virá cheo celebracións, conversas, obradoiros, música, danza, arte, poesía, natureza... e sobre todo moito GALEGO 😃 

e moita ilusión por compartir momentos! 💗

                       

fin de curso

 Chegou a fin de curso e as tan agardadas vacacións 🎉🎊

Foi unha mágoa que chovera o último día e non puideramos despedirnos coa festa que tiñamos preparada 😏

Dende o EDLG desexámosvos...

BO VERÁN!!! 🌊🌞🏄🍉

Aquí vos deixamos algunha foto do último concerto que tivemos no cole, Cé Pantasma. Canto cantamos e bailamos!! 😍👏👏

festa do maio

 O pasado venres festexamos no cole a Festa do Maio. Durante dous días tódolas nenas e nenos colaboraron na colocación do fiuncho, ovos, laranxas e flores.

 Mirade que fermoso quedou! 🌹🌸🌼🌺🌻

Grazas familia pola colaboración 👏

Na festa, o alumnado de 5º leu a biografía de Xela Arias acompañados polo son do acordeón de N. de 3º.

Despois viñeron as cantigas. O alumnado de cada aula interpretou cantigas de grupos galegos como Pelepau, Leilía, Sés, Falperrys ou Sonoro Maxín 🎶🎶
 E para rematar bailamos a Muiñeira de Sabaxáns de Brincadeira arredor do maio. Mirade, mirade que ben o fixemos! 👏👏

 

semana das letras galegas

 Na Semana das Letras Galegas xogamos ao Pasabalabra en tódalas aulas do cole. As nenas e nenos escribiron as definicións buscando palabras relacionadas coa nosa terra, cultura, gastronomía, fauna...

Pasámolo moi ben!!😀

 

Tamén coñecemos a vida de Xela Arias e lemos algúns dos seus poemas. O alumnado de primaria escribiu poemas acompañados de collage coa foto da súa familia.

17 de maio

 Feliz día das Letras Galegas😍

                                                                                       foto ediciónsXerais 

 Aquí vos deixo un poema do libro Darío a diario, escrito por Xela Arias, a poeta homenaxeada este ano.

Tódolos bebés son tu e ningún coma ti.
Tódolos nenos son tu e ningún coma ti.
Tódolos adolescentes son tu e ningún coma ti.
Tódolos mozos son tu en ningún coma ti.
Tódolos anciáns son tu e ningún coma ti.
Tódalas nais son eu e todas, como min, saben que es único.